Library of Tibetan Works and Archives
འགུ་ལོག་དམ་ཆོས་དཔལ་བཟང་ལགས་ཀྱིས་བརྩམས་བྲིས་གནང་བའི་འགུ་ལོག་གི་ལོ་རྒྱུས་གཉན་པོ་གཡུ་རྩེའི་བསང་དུད་ཅེས་པའི་དེབ་ཕྲེང་བཅུ་གཉིས་དང་བཅུ་གསུམ་པའི་བརྗོད་དོན་རྣམས་ཚན་པ་གསུམ་དུ་འདུས་ཡོད། ཚན་པ་དང་པོར་གདོད་མའི་བོད་མི་བྱུང་ཚུལ་ནས་ ༡༩༥༩ བར་གྱི་བོད་ཀྱི་བྱུང་བ་མདོར་བསྡུས་དང་། ཚན་པ་གཉིས་པར་མདོ་སྨད་སྤྱིའི་རྒྱལ་ཁག་དང་ཚོ་ཤོག་ཇི་ཡོད། དེ་དག་གི་འབྱུང་ཁུངས་སྐོར། ཚན་པ་གསུམ་པར་བྱེ་བྲག་འགུ་ལོག་གི་ཚོ་ཤོག་རུ་སྡེ་དང་། ཡུལ་སྲོལ་གོམས་གཤིས། བཟོ་རིག་ལག་རྩལ། འགུ་ལོག་དང་གླིང་གི་འབྲེལ་བ། ཆོས་བརྒྱུད་དང་དགོན་སྡེ་ཇི་ཡོད། དེ་དག་གི་ངོ་སྤྲོད། དེ་བཞིན་འགུ་ལོག་ཁུལ་དུ་མཁས་གྲུབ་ཀྱི་སྐྱེས་ཆེན་དམ་པ་ཇི་ཕེབས་དང་། དེ་དག་གི་རྣམ་ཐར། འགུ་ལོག་ཁུལ་དུ་རྒྱ་དམར་བཙན་འཛུལ་གྱིས་བོད་མིར་དམར་གསོད་དང་། བཙོན་ཤི། མུག་ཤི་ཐེབས་པའི་ཐོ་གཞུང་། ཟུར་བཀོད་དུ་རུས་མཛོད་མེ་ཏོག་སྐྱེད་ཚལ་བཅས་གསལ་ཡོད།
