རབ་གནས་ཤིང་མོ་སྦྲུལ་ལོའི་བོད་ཀྱི་རིག་གཞུང་ཟབ་སྦྱོང་།

༄།  །བཞུགས་སྒར་བོད་ཀྱི་དཔེ་མཛོད་ཁང་ནས་བོད་ཀྱི་ཆོས་དང་རིག་གཞུང་ལ་གཅིག་ཏུ་བློ་སེམས་དཀར་བའི་དོན་གཉེར་ཅན་གྱི་སློབ་ཕྲུག་ཉི་ཤུ་རྩ་ལྔ་སྐོར་ལ། ༢༠༢༥ ཟླ་ ༤ པའི་ཚེས་ ༢ ནས་ཟླ་བ་ ༥ པའི་ཚེས་ ༣༠ བར་ཟླ་བ་གཉིས་ཀྱི་དུས་ཡུན་རིང་བོད་ཀྱི་སྐད་ཡིག་དང་རྩོམ་རིག།  བོད་ཀྱི་གནའ་དེང་གི་ལོ་རྒྱུས།  ནང་ཆོས་ཀྱི་ལྟ་གྲུབ།  དེ་དག་དང་འབྲེལ་བའི་ལས་འཆར་བཅས་ཀྱི་ཐོག་སློབ་ཁྲིད་དང་རྒྱུས་སྟོན།  ཉམས་ཞིབ་ཀྱི་བྱེད་སྒོ་བཅས་གང་ཐུབ་གོ་སྒྲིག་ཞུ་རྒྱུ་ཡིན།  ཟབ་སྦྱོང་འདིར་འཛུལ་ཞུགས་གནང་འདོད་ཡོད་པ་རྣམས་ནས་གཤམ་གསལ་ཆ་རྐྱེན་ངེས་པར་འཚང་དགོས།

༡   བོད་མི་རྣམས་ནས་བོད་ཀྱི་ལག་དེབ་ལྗང་ཁུ་ཕྱི་ལོ་ ༢༠༢༤ བར་བཀང་ཟིན་པ་དང་།  རྒྱ་གར་ཧི་མཱ་ལ་ཡར་གནས་སྡོད་དང་།  འབྲུག་དང་བལ་ཡུལ་བཅས་ནས་ཡིན་ན་རང་གི་ངོ་སྤྲོད་ལག་འཁྱེར་བཅས་ཀྱི་འདྲ་བཤུས་འདིར་འབུལ་དགོས།

༢   རང་གི་ཤེས་ཚད་ལོ་རྒྱུས་འཁོད་པའི་བོད་ཡིག་ལག་བྲིས་འབྲི་རྩོམ་ཞིག་འདིར་འབུལ་དགོས།

མཐུན་རྐྱེན།

སློབ་ཡོན་རིན་མེད་དང་།  དགེ་རྒན་དང་དེབ་སོགས་ཀྱི་མཐུན་རྐྱེན་ཡང་སྦྱར་རྒྱུ་ཡིན།    སློབ་ཁྲིད་ཡོངས་རྫོགས་བོད་ཀྱི་སྐད་ཡིག་གི་ལམ་ནས་འགྲེལ་བརྗོད་ཞུ་རྒྱུ་ལགས་སོ།།

ཟབ་སྦྱོང་དུ་འཛུལ་ཞུགས་སྙན་ཞུ་དྲུང་ཆེའི་མཚན་ཐོག་ཕྱི་ཟླ་ ༣ པའི་ཚེས་ ༢༥ ཡི་སྔོན་ལ་གཤམ་གསལ་ཨི་མེལ་བརྒྱུད་འདི་གར་ཕུལ་འབྱོར་ཟིན་པ་དགོས།  འདི་ནས་ཕྱི་ཟླ་ ༣ པའི་ཚེས་ ༢༧ ཉིན་ཁྱེད་རང་འདི་གར་ཚུད་མིན་ལན་གསལ་འབུལ་རྒྱུ་ཡིན། ཁྱེད་ཀྱི་སྙན་ཞུའི་ནང་རང་གི་དྲ་རྒྱའི་ཁ་བྱང་(Email Id.)དང་ཁ་པར་ཨང་གྲངས་ངེས་པར་དུ་བཀོད་དགོས་པ་ཐུགས་འཇགས་འཚལ།  བོད་ཀྱི་དཔེ་མཛོད་ཁང་གི་འཛིན་སྐྱོང་ཡིག་ཚང་ནས་ཕྱི་ལོ་ ༢༠༢༥ ཟླ་བ་ ༣ པའི་ཚེས་ ༡༢ ལ།།

For further information contact:

The Office Secretary
Library of Tibetan Works & Archives
Dharamshala – 176215
H.P., India
Phone: +91-9882255047
Email: ltwa1970@gmail.com