Library of Tibetan Works and Archives
བཞུགས་སྒར་ཉེ་འཁྲིས་འཇམ་དབྱངས་ཆོས་གླིང་དུ་ནང་ཆོས་སློབ་གཉེར་གནང་མཁན་བཙུན་མ་བསྟན་འཛིན་ཟླ་སྒྲོན་དང་། རྒྱ་གར་སིཁ་མི་རིགས་ནང་པའི་ཆོས་ཀྱི་རྗེས་འཇུག་བཙུན་མ་ Savinder Kaur Gill གཉིས་མཉམ་རུབ་ཀྱི་ཐོག་ནས་ལོ་ངོ་ཉིས་སྟོང་ལྔ་བརྒྱའི་གོང་གི་སངས་རྒྱས་བཅོམ་ལྡན་འདས་ཀྱི་གསུང་དང་། ལོ་ངོ་ལྔ་བརྒྱ་ལྔ་བཅུ་ཙམ་གྱི་གོང་བྱོན་པའི་གུ་རུ་ནཱ་ནཀ་མཆོག་གི་གསུང་གཉིས་སློབ་དཔོན་མི་འདྲ་བ་གཉིས་ཡིན་ནའང་གསུང་འཕྲིན་གཅིག་གྱུར་ཡིན་པའི་སྐོར་དེབ་གསར་ཞིག་བཏོན་ཡོད་ཅིང་། དེ་ལ་བོད་ཀྱི་དཔེ་མཛོད་ཁང་གི་པར་བསྐྲུན་ལས་རོགས་ཡོན་ཏན་ལགས་ཀྱིས་གཙོ་བོ་དེབ་དེའི་ནང་སིཁ་ཆོས་ལུགས་དང་ནང་པའི་དབར་འདྲ་བའི་ཆ་རྣམས་མཚུངས་བསྡུར་གནང་ཡོད་པ་འགྲེལ་བརྗོད་གནང་འདུག ཡང་ཁོང་གིས་ནང་ཆོས་ཀྱི་ནང་འདོད་ཆགས། ཞེ་སྡང་། གཏི་མུག་སོགས་སྡུག་བསྔལ་གྱི་རྩ་བ་ཡིན་པར་གསུང་གི་ཡོད་པ་བཞིན་སིཁ་ཆོས་ལུགས་ཀྱི་ནང་དུའང་བློ་ཉོན་མོངས་པའི་རིགས་དང་དེ་ཚོ་ལ་གཉེན་པོ་བསྟེན་སྟངས་གསུང་གི་ཡོད་ཅིང་། ནང་པའི་ཆོས་ནི་ལོ་ངོ་ཉིས་སྟོང་ལྔ་བརྒྱ་ལྷག་གི་གོང་དུ་བྱུང་བ་དང་། སིཁ་ཆོས་ལུགས་ནི་མི་ལོ་ལྔ་བརྒྱ་ཙམ་གྱི་གོང་དུ་བྱུང་ཡོད་པའི་ཁར་སིཁ་ཆོས་ལུགས་ཀྱི་སྲོལ་འབྱེད་པ་གུ་རུ་ནཱ་ནཀ་མཆོག བོད་དང་། ཧི་མ་ལ་ཡའི་རི་བརྒྱུད་ནས་སིངྒ་ལ་ཚུན་ལ་གནས་སྐོར་དུ་ཕེབས་མྱོང་ཡོད་པས་གུ་རུ་ནཱ་ནཀ་མཆོག་ལ་ནང་ཆོས་ཀྱི་ཤུགས་རྐྱེན་ཐེབས་དོན་བྲིས་འདུག་ཅེས་ངོ་སྤྲོད་གནང་འདུག དེབ་དེ་ནི་གུ་རུ་ནཱ་ནཀ་མཆོག་སྐུ་འཁྲུངས་ནས་ལོ་ངོ་ ༥༥༠ འཁོར་བའི་དུས་དྲན་དང་སྟབས་བསྟུན་དྲ་ཐོག་ཏུ་བཏོན་ཡོད་ཅིང་། སྤྱི་ཟླ་ ༡༡ པའི་ཚེས་ ༡༢ ཉིན་དྲ་ཐོག་ཏུ་སྤེལ་བའི་དེབ་དེར་ཤོག་ངོས་ལྔ་བརྒྱ་ལྷག་དང་ལེའུ་དྲུག་བཅས་ཡོད་པ་དང་། རྒྱ་གར་བ་ནང་པའི་བཙུན་མ་ཆོས་མིང་ཀརྨ་བཀྲ་ཤིས་ཆོས་སྒྲོན་ལགས་ནི་རྒྱ་གར་སིཁ་ཆོས་ལུགས་ཀྱི་རྗེས་འཇུག་པའི་ཁྱིམ་དུ་འཁྲུངས་ཡོད་ནའང་ཐེ་ལན་རྒྱལ་ཁབ་ནང་འཕགས་པ་གནས་བརྟན་པའི་ནང་པའི་ཆོས་ལ་སློབ་གཉེར་བརྒྱུད་ཁོར་ཡུག་དང་ཐོན་ཁུངས་ཀྱི་ཐོག་ཏུའང་འབུམ་རམས་པའི་སློབ་གཉེར་མཐར་སོན་ཡོད་པ་དང་།བཙུན་མ་བསྟན་འཛིན་ཟླ་སྒྲོན་ནི་བཞུགས་སྒར་ཉེ་འཁྲིས་འཇམ་དབྱངས་ཆོས་གླིང་དུ་ལོ་ངོ་བཅུ་གསུམ་ཙམ་གྱི་རིང་ནང་པའི་ལྟ་གྲུབ་དང་བོད་ཀྱི་སྐད་ཡིག་ཐོག་སློབ་གཉེར་འཐོན་ཡོད་པ་མ་ཟད། རྒྱ་གར་གྱི་ལྡི་ལི་སློབ་ཆེན་དུ་ནང་ཆོས་ཐོག་ཞིབ་འཇུག་སློབ་མའི་ཕྱག་ཁྱེར་བཞེས་མྱོང་ཡོད་པ་རེད།།
