གཙོ་ངོས། / ངག་རྒྱུན་ལོ་རྒྱུས་སྡེ་ཚན།

ངག་རྒྱུན་ལོ་རྒྱུས་སྡེ་ཚན།

རྗེས་མ། སྔོན་མ།
 
རྗེས་མ། སྔོན་མ།

ངག་རྒྱུན་ལོ་རྒྱུས་སྡེ་ཚན།

༄༅། །ལྷར་བཅས་སྲིད་ཞིའི་གཙུག་རྒྱན་སྤྱི་ནོར་ྋགོང་ས་ྋསྐྱབས་མགོན་ྋརྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ནས་དགོངས་གཞི་དགོས་པ་བླ་མེད་ཀྱིས་བོད་ཀྱི་ཆོས་དང་རིག་གཞུང་གཅེས་སྐྱོང་གོང་འཕེལ་གྱི་རྨང་གཞིའི་སྲི་ཞུར་དམིགས་ཏེ། ཕྱི་ལོ་ ༡༩༧༠ ལོར་བཞུགས་སྒར་བོད་ཀྱི་དཔེ་མཛོད་ཁང་འདི་བཞིན་ཆེད་དུ་རྩ་འཛུགས་བསྐྱངས་པ་ལྟར། བོད་ནང་དུས་འགྱུར་རྐྱེན་དབང་ཤུགས་དྲག་གིས་བོད་བསྟན་སྲིད་མི་རིགས་ལོ་རྒྱུས་གོམས་སྲོལ་དང་བཅས་པར་ཉམས་རྒུད་སྣ་ཚོགས་བྱུང་དང་འབྱུང་མུས་ཐོག རང་རེའི་མཁས་མྱོང་གཉིས་ཅན་གྱི་བགྲེས་སོང་ཁག་རིམ་གཤེགས་ལོ་རེར་ཇེ་ཉུང་དུ་འགྲོ་བཞིན་མི་རབས་བརྗེས་དང་བརྗེ་མཚམས་སུ་གཏུགས་པ་སོགས་བློས་འགན་བཟོད་བྲལ་གྱི་གནས་ལ་བརྟེན། འདི་ག་བོད་ཀྱི་དཔེ་མཛོད་ཁང་ངག་རྒྱུན་ལོ་རྒྱུས་སྡེ་ཚན་ནས་བཙན་བྱོལ་བོད་མིའི་སྤྱི་ཚོགས་ཁོངས་སེར་སྐྱ་ཞི་དྲག་མི་སྣ་རྒན་རབས་རྣམས་ཀྱི་ཞལ་རྒྱུན་ཁོ་ནར་གནས་པའི་བོད་ཀྱི་རྒྱལ་རབས་ལོ་རྒྱུས་དང༌། ཡུལ་དགོན་མཁར་རྫོང་གི་ཆགས་རབས། རིས་མེད་སྐྱེས་ཆེན་དང་གྲུབ་ཐོབ་རྣལ་འབྱོར་ཕོ་མོའི་མཛད་པ་རྣམ་ཐར། གསང་སྔགས་ཐུན་མོང་མ་ཡིན་པའི་དབང་བཀའ་དང་མན་ངག་ཟབ་ཁྲིད། ལྷ་ལྡན་སྨོན་ལམ་ཆེན་མོ་སོགས་གདན་ས་ཆོས་བརྒྱུད་མ་ལག་སོ་སོའི་མདོ་སྔགས་ཕྱག་བཞེས་ཆོག་རྒྱུན་དང་གར་ཐིག་དབྱངས་གསུམ། ཆབ་སྲིད་ཞི་དྲག་གི་སྣེ་མོ་བ་དང་དཔོན་བརྒྱུད། རིག་གནས་དང་ལག་རྩལ་མཁས་པ་སོགས་མི་སྣ་གྲགས་ཅན་རིགས་ཀྱི་ལོ་རྒྱུས། གཏེར་དངོས་ཁྱད་ནོར་དང་ལག་རྩལ་ཐོན་ཁུངས། ཡུལ་ལུང་ཡས་མས་སོ་སོའི་ལོ་གསར་སོགས་དུས་སྟོན་ཁག ནམ་དུས་དང་འབྲེལ་བའི་ཞིང་འབྲོག་འཚོ་བའི་ལས་རྩོལ་རྣམ་གྲངས། གཉེན་སྒྲིག་ཆང་སའི་ལམ་སྲོལ། བླ་སློབ་རིམ་བརྒྱུད་དང་ཕ་ཚེ་བུ་རབས་སུ་བརྒྱུད་པའི་ཆོས་སྲིད་ལས་འབྲས་དང༌མི་སྤྱོད་ཡ་རབས་སུ་སྤྱོད་པའི་ཟབ་གནད་སྟོན་པའི་གདམས་ངག་ཞལ་རྒྱུན། སྒོ་ཟོག་སེམས་ཅན་སྐྱེ་འཕེལ་སྐྱོང་གསུམ་སྐོར། ཡངས་ཤིང་རྒྱ་ཆེའི་གངས་ཅན་བོད་རྒྱལ་ཁབ་ཆེན་པོའི་མཐའ་དབུས་ཁོར་ཡུག་གངས་རི་དང༌། གནས་རི། རྩྭ་ཐང༌། ཆུ་ཆེན། མཚོ་དང་མཚེའུ་སོགས་ཀྱི་གནས་བབས། རི་ཀླུང་སྐམ་གཤེར་དུ་གནས་པའི་སྲོག་ཆགས་སྤྱི་སྒོས་ཀྱི་རྣམ་གྲངས། རང་བྱུང་ཁྱད་ཆོས་དང་འབྲེལ་བའི་ཁོར་ཡུག་སྲུང་སྐྱོབ་སྐོར། བོད་རང་གི་ཕོ་མོ་རྒན་བྱིས་སོ་སོའི་རྩེད་མོའི་རྣམ་གྲངས་དང་རྩལ་སྦྱོང༌། ཡུལ་ལུང་སོ་སོའི་ཕོ་མོའི་ཆས་གོས་དང་རྒྱན་ཆའི་བྱེ་བྲག ལྷག་པར་གཞས་ཆེན་དང༌། གདངས་རིང༌། འཁྲུག་གཞས། ལ་གླུ། འབྲོག་གཞས། གླིང་སྒྲུང༌། འབྲས་དཀར་དང་རྦད་ལ་སོགས་པའི་བཤད་པའི་རྣམ་གྲངས། ཕ་གཏམ་བུ་འཇགས་ཀྱི་ཁ་ཤགས་དང་གཏམ་དཔེ། འདས་པའི་ལོ་རྒྱུས་མཚོན་ནུས་ཀྱི་དཔྱད་གཞས་དང་རྒྱག་གཏམ་གླུ་ཤགས་སོགས་མདོར་ན་བོད་མིའི་ཐུན་མོང་མ་ཡིན་པའི་ཁྱད་ཆོས་དང༌། རང་ཆས་སུ་ཡོད་པའི་གོམས་གཤིས་བཟང་པོ་རྣམས་སྔོན་རྗེས་རྒྱུན་མཐུད་ཡོང་སླད་རྒྱ་གར་དུ་རྟེན་གཞི་བྱས་པའི་བཙན་བྱོལ་བོད་མིའི་གཞིས་ཆགས་ཁག་དང༌། ལ་དྭགས་དང། ཁུ་ནུ། གར་ཞྭᨎ སྤི་ཏི་སོགས་ཧི་མཱ་ལ་ཡའི་རི་རྒྱུད། དེ་བཞིན་བལ་ཡུལ་དང། འབྲུག་ཡུལ། ཀ་རྡོར་སྒང་གསུམ་སོགས་བོད་མིའི་འདུ་སྡོད་གནས་ཡུལ་གང་ས་ནས་ད་ལྟ་འཚོ་བཞུགས་སེར་སྐྱ་བགྲེས་སོང་ཁག་ཆེད་དུ་གདན་ཞུའམ། ཡང་ན་ཁུངས་སོ་སོར་མི་འགྲོ་ཆེད་བཅར་གྱི་ལམ་ནས་བོད་ཆོལ་གསུམ་རྒྱ་ཁྱབ་ཚང་མའི་ལོ་རྒྱུས་ཅི་རིགས་འཚོལ་ཞིབ་སྒྲ་སྡུད་འཁོར་ཐག་ནང་བཅུག་སྟེ་ཉར་ཚགས་གསོག་སྒྲུབ་དང། ལོ་རྒྱུས་གསུང་པ་པོ་སོ་སོས་མྱོང་རྒྱུས་དགོངས་ཚུལ་ཇི་གསུངས་སོར་བཞག་ཐོག་ཡིག་འབེབས་དག་ཞུ་མཐིལ་ཕྱིན་དང་སྦྲགས་ཕྱོགས་བསྒྲིགས་ཞུས་ཏེ། རང་རེའི་བོད་མིའི་སྤྱི་ཚོགས་ཁྲོད་ཉམས་ཞིབ་དཔྱད་གཞིའི་སླད་དེབ་ཕྲེང་རིམ་མཐུད་དཔར་འདོན་ཐུབ་ཐབས་ཁུར་བརྩོན་ཞུས་དང་ཞུ་མུས།

 

སྡེ་ཚན་འགན་འཛིན།

 


མཚན།  ཚེ་དབང་བུ་འཁྲིད།
གློག་འཕྲིན།  oralhistoryltwa(at)gmail.com